Бейсенбі, 02 Тамыз 2018 14:48

Ауданымыз – чемпион!

 

«Абыройың арта берсін!» деп абыздардан бата алған жастарымыз намысты қолдан бермеді, білекті байқауда өрледі, бірінші орын алып жігіттеріміз ерледі. Айтпағымыз, Сарыөзек кентіндегі №12740  әскери бөлімінде өткен облыстық «Айбын» әскери-патриоттық, спорттық ойынында бірінші орынды қанжығалады. Жақында аудан әкімінің орынбасары Айбек Бидаев білекті, жүректі жастарымызды қабылдап, салтанатты жағдайда құттықтады.

Байрақты бәсекеге Жеті-су өңірінен 15 ауданның құрамасы қатысты. Астананың 20 жылдығы құрметіне орай жалауы желбіреген шарада жігіттеріміз әскери-медициналық дайындық, сапта жүру,спорттық бағдарлау, ату жаттығулары, АК-74 бөлшектеу және жинау, кермеге тартылу, кросс, әскерилендірілген эстафета сындарынан сүрінбей өтті. сөйтіп, мәреге бірінші боп жетті. Жеңімпаздарымызды құттықтаған Айбек Дүйсембек-ұлы: – Жастарға қолдау көрсету, уақыттарын тиімді пайдалануына мүмкіндік туғызу – Елбасымыздың нақты бағдарламасы. Сонымен қатар, ауданымыздың әкімі Бинәлі Әбдіқапасұлы да бұл саланы бір мезет көзден таса қылмайды. Нәтижесінде, міне, осындай байрақты бәсекелерде Сіздер сенімдерімізді ақтап отырсыздар. Мұндайда қазақ: «Бәрекелді! Өркенің өссін!» деген. Біздің де айтпағымыз осы, ешқашан өздеріңізді жан-жақты дамытудан жалықпаңыздар. Өйткені, әрбіріңіз еліміздің гүлденуіне зор үлес қосатын нағыз патриот жастарсыздар! Сіздерге есігіміз әрдайым ашық, – деп бірігіп жұмыс істеуге шақырды.

Осы ретте ауданымыздың намысын қорғаған команда мүшелерінің есімін жазбау бізге сын: Еламан Маратұлы, Владислав Князев, Ғалым Нұрқалық, Азамат Қасым, Архат Силанбек. Екі күнге созылған жарыс қорытындысы бойынша көксулықтар үшінші, Кербұлақ ауданының құрамасы екінші орынды місе тұтты.

 

Қайнар ЖҰМАҒОЖА.

Қаралды 54 рет
Толығырақ бұл категорияда: « Суперкубок акима района
Copyright © 2014 Меншік иесі: ТОО "Еңбекшіқазақ" Есік қаласы, Алматы обласы № 4270-Г

Жарнама