Бейсенбі, 22 Маусым 2017 19:43

Ақпарат айдынындағы газет және интернет-сайт

28 маусым – Ақпарат және байланыс қызметкерлерінің күні

28 июня – День работников информации и телекоммуникаций РК

    Қандай да болсын өтпелі, өзгерістер замандарында, қоғам дамуының күрделі кезеңдерінде бұқаралық ақпарат құралдарының атқарар қызметі арта түсері ақиқат. Жаңа тарих беттерін аударып, ақтарсақ жиырма алтыншы жылға аяқ  басқан Тәуелсіздігіміздің өзі ғасырға жүк боларлық оқиғаларға, өзгерістерге толы болды. Кеңес Одағы ыдырап, Балтық жағалауы елдерінен бас-тап бұрынғы одақтас республикалар өз тәуелсіздігін жариялап жатты. Осы кезеңдегі сарғая бастаған газет беттерін қарап отырсақ «жалақы жоқ, зейнетақы жоқ» деген сөздер көбірек те, алаң елдің назарында алдымен әлеуметтік төлемдердің үзіліп қалу фактілері, өндіріс орындарының жұмысын тоқтатып, жұмыссыздықтың ұлғаюы секілді «жоқтар» мен келеңсіздіктер көп болғанын байқаймыз. Тоқсаныншы жылдар басында Тәуелсіздік таңы атып Қазақ елінің өз билігі өз қолына тиген кезеңнен бастап сөз ауаны өзгере бастады. Газет жоқ-жітіктер емес мемлекеттік деңгейдегі мәселелер: егемен елдің Ата заңы, мемлекеттік басқару құрылымдары, рәміздер дегендей бұрынғы кеңестік одақтың белгілерін тарих қойнауына – архивтерге жөнелтіліп, әлем картасындағы ежелгі де жаңарған жас мемлекеттің айшықты белгілері, бүгінгісі мен болашағы орын алды.

    Ақпаратты адамның жолы ашық. Ашық жолмен алаңсыз діттеген мақсатқа жетесіз. Осы тұрғыдан алғанда көнеден келе жатқан дәстүрлі ақпарат құралдарынан – газет-журнал, радио, теледидардан тыс ғаламтор желілері пайда болды. Бұл ақпарат құралдарын әлеуметтік желілер деп атап та үлгердік. Фейсбук, инстаграмм, вконтакте тағы басқа өрмекшінің торындай әлемді тұтас қоршап алған желілердің ақпарат алмасудағы, таратудағы жеделдігі таң қаларлық та қолайлы екендігі шындық. Дейтұрғанмен, дәстүрлі ақпарат құралы, нақтыласақ газет те өз маңызын, қолданылу аясын жоғалта қойған жоқ. Аудан көлеміндегі ақпарат құралдарының ішінде «Еңбекшіқазақ» газеті ерекше орын алады. Өйткені, терең тарихы, тұрақты оқырмандары бар газетіміздің ақпарат беру аумағы да кең және ауқымды. Сонымен қатар газет пен оқырман арасындағы байланыс іскерлік, өндірістік, тұтынушылық жағынан да кеңейе түсуде. Бір ғана мысал: мемлекеттік жоғарғы биліктің атқарушы органдарға қойып отырған талабы мемлекеттің сан алуан қызметтері туралы ақпарат тұрғындарға үздіксіз жеткізіліп тұруы керек. Оқырман өзі де аңғарған болар, бұл талапты және оның орындалу барысын. Ақпарат құралдарының қатарына жыл санап емес, ай санап күн санап кіріп келе жатқан әлеуметтік желілерді де газет редакциясы қолдана отырып интернет-парақшасын ашып қойды. Бүгінгі күні үйінде компьютер, қалтасында смартфон т.б. гаджеттері жоқ тұрғындар некен-саяқ. Сондықтан да газетке түскен ақпараттарды әлеуметтік желілер арқылы тарату жолында тәжірибе жинақтаудамыз, enkaz.kz парақшасы қолданыста.

    Елбасымыздың көштен қалмай даму жолында, рухани жаңғыру жолындағы бағыт-бағдарламаларының орындалуы, тікелей десе де болады, ақпараттық кеңістікті ұтымды пайдалануға байланысты.

 

Хайролла Ахметжанов.

Қаралды 134 рет
Copyright © 2014 Меншік иесі: ТОО "Еңбекшіқазақ" Есік қаласы, Алматы обласы № 4270-Г

Жарнама