Болар бала болмысынан байқалатыны бесенеден белгілі. Алла Тағала әрбір жанды жаратқанда өзіне тән ерекшелікке бейімдейтіні де рас. Биылғы жылдың желтоқсан айында жасампаз жас – жетпіске толған жерлесіміз, Қазақстан Республикасының еңбек сіңірген жаттықтырушысы, еркін күрестен КСРО спорт шебері Надырбеков Мәлік Надырбекұлы бойына біткен бейімін ерінбей баптап, үлкен ізденіс, жалықпай жаттығудың арқасында осындай жетістікке қол жеткізгені де шындық.
Қараша айының алғашқы аптасының сәтін салған сәрсенбісінде Қазақстан Республикасы Тәуелсіздігінің 30 жылдығына орай еркін күрестен ел намысын қорғайтын ерен ерлерді бабында баптап, жарысқа атойлатқан жаттықтырушы Мәлік Надырбековтің жетпіс жас мерейтойының құрметіне Шелек ауылындағы Абай атындағы мектепте еркін күрестен облыстық турнир өтті.
Шелек балалар мен жасөспірімдер спорт мектебінің директоры, кикбокстан халықаралық дәрежедегі спорт шебері, Азия және Еуропаның екі дүркін чемпионы, әлем кубогінің иегері Елмұрат Қайыпжановтың ұйымдастыруымен, аудан, Шелек ауылдық әкімдерінің қолдауымен жас балуандар боз кілемде белдесуге жиналды. Жарыстың ашылу салтанатында аудан әкімінің бірінші орынбасары Айбек Бидаев, аудан әкімінің орынбасары Алтай Досымбаев, меценат, «Жомарт жүрек» медалінің иегері, Еңбекшіқазақ ауданының құрметті азаматы Жангелді Осан, Шелек ауылдық округінің әкімі Сәкен Абдыхалиев мерейтой иесін құттықтап сөз сөйлеп, жас балуандарға сәттілік тіледі. Мәлік Надырбекұлына шапан жауып, ат мінгізді, Құрмет грамоталары мен Алғыс хаттар табыстады. Ауданымыздан Мәлік атасындай боз кілем үстінде атой салып, әлемді аузына қаратқан балуандар шығуына жақсы тілек айтылды. М.Надырбековтің жетпіс жасқа толғанына арнайы шығарылған мерекелік медальдармен келген құтты қонақтар, ізін басқан шәкірттері, әріптес достары марапатталды.
2007-2008-2009 жылы туған жасөспірімдер арасында өткен бұл белдесуге Жамбыл және Шығыс Қазақстан облыстарының, Алматы, Қапшағай, Талдықорған қалаларының, Алматы облысының әр аудандарының командалары бақ сынасуға келіпті. Екі күнге созылған бұл жекпе-жекте салмақ деңгейінде алдыңғы үштікті өзара бөліскен балуандарға алтын, күміс және қола медальдар мен мақтау қағаздары, заттай сыйлықтар салтанатты түрде табыс етілді.
Мәкеңнің жастық шағының куәсі болған Достық ауылында жергілікті кәсіпкер Айқын Қоғамбаев арнайы көкпар ұйымдастырып, балуанға ат мінгізіп, шапан жапты. Осы аталған іс-шаралар мейрамханада ардагер азаматтың жетпіс жасқа толған мерейтойына ұласты.
Анарбек БЕРДІБАЕВ.
