Өткен аптада Есік қаласындағы спорт сарайында аудан әкімінің жүлдесіне арналған қазақ күресінен «Еңбекшіқазақ бөрісі» жарысы өтті.
Байрақты бәсекеге ауданның 23 ауылдық округінен балуандар қатысып, өзара мықтыны анықтады. 90 килограмнан жоғары салмақ дәрежесінде өнер көрсеткен спортшылардың барлығы дерлік қазақ күресінің хас шеберлері. Десек те, боз кілемдегі белдесу мықтыны анықтап берді. Нәтижесінде, І орын рахаттық Нұрғали Жолтаевқа бұйырды. ІІ орынға қырбалтабайлық Ерсін Хамза жайғасып, Қырбалтабай ауылының балуаны Азамат Қалықовқа ІІІ орын бұйырды.
Жүлделі орынға ие болған спортшылар аудан әкімінің дипломымен, қаржылай сыйлықтармен марапатталды. І және ІІ орынға ие болған балуандар Нұрғали Жолтаев пен Ерсін Хамза облыстық «Жетісу» бөрісі жарысына жолдама алды. Жеңімпаздарды марапаттаған аудандық ішкі саясат, мәдениет, тілдерді дамыту және спорт бөлімінің бас-шысы Салтанат Беспаева балуандарға сәттілік тіледі.
Облыстық бәсеке 29-30 сәуірде Талдықорған қаласында өтеді.
С.НҰРАДИН.
