Туған жерінің тарихын білу – әрбір адамға бұлтартпас борыш болып саналары талас тудыратын іс емес екені баршаға аян. Қазақстан Республикасы бойынша жан саны ең көп ауылдардың бірі болып саналатын Шелек ауылының да тарихы том-том кітапқа жүк болары белгілі жайт.
Өткенін білмеген бүгіннің маңызын түсінбейтіні де шындық. Жастарды туған жерінің тарихын біліп өсуге жетелеу мақсатында жақында Шелек тарихи-өлкетану музейінде «Қойнауы тарих, киелі өлке Шелегім» атты музей сағаты өтті. Музей сағатында Шелек ауылының өткен тарихы, Ұлы Жібек жолының бойына орналасқан, кейіннен жоңғар шапқыншылығы кезінде күйреген ежелгі Шілік қаласы туралы айтылып, Шелек ауылынан табылған қыш құмыралар таныстырылды.Сонымен бірге журналист Нұрлан Мұхаметқалиев пен Еңбекшіқазақ ауданының құрметті азаматы Алмагүл Орынбетова жазған «Шелек тарихи-өлкетану музейі» кітабы мектеп кітапханасына сыйға берілді. Музей сағатына Қайрат ауылындағы И.Саттаров атындағы орта мектептің педагог-ұйымдастырушы Гульвира Мординова мен 5 сынып жетекшісі Ғалия Мақұлбекова және аталған мектептің оқушылары қатысты.
Қуанәлі АЛМАСБЕКҰЛЫ,
Шелек тарихи-өлкетану музейі.
